তোমাৰ আকাশ নীলা চকুযুৰিত চালে
এনে লাগে যেন
টোপাল টোপাল বৰষুণেৰে বহাগ
মোৰ বুকুলৈ নামিব,
জীয়াই উঠিব ভালপোৱাৰ গান
জীৱনে সুৰময় কথা পাতিব,
বতাহে উৰুৱাই আনিব তোমাৰ সুবাস ।
এক অজানা মায়া আছে তাত
কিয় বাৰু মায়াৰ এই বান্ধোন
বহাগৰ লগত বৰষুণৰ বতৰা
সপোনৰ সাধনা,
সপোনে কঢ়িয়াই আনে তোমাৰ প্ৰাণময়
নীলা দুচকুৰ জীয়া জীয়া দিঠক ।
আমাৰ পৰিচয় বহাগেৰে,
তুমি কৈছিলা তোমাৰ ভাললগাবোৰ
মই শুনি গৈছিলো কথাবোৰ
মনে মনে মিলি গৈছিল আমাৰ
তুমি জনা নাছিলা
মোৰো যে ভাল লাগে বহাগ ।
জীৱন সমীপেষু;
মই বহাগৰ নষ্ট কবিতা
ভালপোৱাৰ জোখাৰে মৰমবোৰ সাৱতি ল`বা;
হয়তো সময়ে পাহৰিব পাৰে
বহাগৰ ঠিকনা ।
: সীমান্ত কলিতা (তেজপুৰ কেন্দ্ৰীয় বিশ্ববিদ্যালয় )
