তাইৰ দেহৰ ভাঁজত হেজাৰটা ভেকুলীৰ আৰ্তনাদ

বিমূৰ্ত সপোন এটাই বাৰে বাৰে বিচাৰি ফুৰে

নিউটনৰ তৃতীয় সূত্ৰ ৷

তাইৰ দেহৰ ভাঁজত হেজাৰটা ভেকুলীৰ আৰ্তনাদ

“টু বি অৰ নট টু বি”ৰ মাজত আৱিস্কাৰ কৰে নিজক

নপানীত গাভৰু দেহে মনৰ জনক হিয়া দিছিল

হিয়াৰ জনক মন ৷

দলঙৰ শেলুৱৈবোৰে খুটিয়াই খুটিয়াই বিচাৰি

আনিছিল দুপৰৰ ভোক ৷

দৰিকণা মাছবোৰে লাজত মূৰ দোৱাইছিল

দেখি উষ্ম আলিংগন ৷

সাউদৰ ডিঙা দেখি উজাই আহিছিল

অস্পৃশ্য পদুম ৷

সৰু সৰু লতাবোৰত পাক খাই থকা

সপোনবোৰ সিহঁতে লৈ আহিছিল আশাৰে

এনেকৈ অংকুৰিত হয় তাইৰ দেহত উত্তৰ কালৰ

সোনোৱালী বীজ ৷

বহাগে শৰতে দি যায় উলহৰ ঢল ৷

তাইৰ হেঙুলী পাহিত নাছে সপোন ময়ুৰী ৷

তাইৰ গৰ্ভৰ দুৱাৰ খুলিল কি নুখুলিল

শৰতে বাগৰ সলালে কি নসলালে

চাৰিওফালে ঘেৰি ধৰিলে জ্বলন্ত উল্কাপিণ্ডৰ

আস্ফালন ৷

ক্ষত বিক্ষত সপোনে শুনে

কৰোবাত ভাহি উঠা বাঁহীৰ কৰুণ সুৰ

“মেৰে নেনা শ্বাৱোন ভাদো, কি

ফিৰ ভি মেৰে মন পিয়াছা ৷”

– মোবাইল : (৯৭০৬১২৯৪৯৫)